أهم 6 حاجات لازم تعملها في رحلتك للعين السخنة

2018-10-21

نعمل أيه في العين السخنة ؟ ناس كتير بتسأل السؤال ده لنفسها وصحابها لأنهم فاكرين إنها وجهة مملة ومفيهاش أنشطة ترفيهية أو خروجات كتير زي الساحل أو الجونة لكن في الحقيقة هي من أجمل الوجهات السياحية اللي ممكن تروحها في مصر لأنها مليانة مساحات خضراء وطبيعة خلابة تخليك تنسى كل هموم الدنيا و زحمة القاهرة وكل الضغوط اللي عليك.

ده غير أنها بتتميز بموقعها الإستراتيجي على ساحل خليج السويس في البحر الأحمر وعلى بعد 55 كم عن مدينة السويس وهي أقرب منتجعات البحر الأحمر للقاهرة ، يعني ممكن توصلها في خلال ساعة واحدة بس ، علشان كده العين السخنة تعتبر الوجهة الأولى لكل اللي عايز يستريح ويستجم ويبعد عن روتين الحياة اليومية وبيزيد الإقبال عليها بين كل اللي بيدورا على رحلات اليوم الواحد.


via GIPHY

 أما بالنسبة للشواطئ ، فهي بتتميز بسحرها وجمالها بالإضافة للونها الفيروزي الصافي و رمالها الذهبية الناعمة ، فتحس أنك عايز تمارس كل الأنشطة اللي نفسك فيها زي السباحة والغوص والصيد لأن الموج هادي طول الوقت ومنظر البحر بيكون أحلى من أي مكان على البحر الأبيض المتوسط . ده غير أنك ممكن تمارس أنشطة تانية كتير زي كرة اليد، والقدم، والتنس...إلخ.

العين السخنة بتتميز كمان بكثرة المنتجعات السياحية بها وتنوع أنشطتها وتصميماتها الهندسية وأسعارها علشان تناسب كافة الإحتياجات والمتطلبات.

الحياة في العين السخنة

  • رحلات اليخت

ودي من أحلى المغامرات البحرية اللي ممكن تعملها في العين السخنة الصبح لأن مفيش أجمل من إنك تعيش يوم كامل في قلب البحر مع أهلك وصحابك وبالذات لما البحر يكون هادي وجميل زي ما قلنا قبل كده ، فتقدر تطمن على ولادك كمان وتاخدهم معاك من غير خوف.


مش كده و بس ، اليخت كمان من الرحلات المفضلة لبنات كتير و بالذات اللي أهلهم بيخافوا عليهم من السفر لمسافات طويلة ، فحضري كريم البشرة بتاعك ولبسك المفضل و إستعدي لمغامرة جديدة مع صحابك . و هناك هتقدري تعملي حاجات كتير ، هتسمعي أغاني ، و تاخدي حمام شمس ، و هتنزلي البحر، وهتاكلي أكلة سمك طازة وتشمي هواء نضيف وهستعيدي طاقتك وحيويتك من أول وجديد...فأنسي إنك تزهقي !

أفضل يخوت في العين السخنة: الروبي، وبرنس عمر، والأسطورة، والقبطان، والصديق. وأسعارها بتتميز بتنوعها وبتتراوح من 1000 – 2000 جنيه في اليوم.

بس للأسف الرحلات دلوقتي متوقفة لأسباب أمنية و هترجع قريب قوي . عشان تعرف كل اليخوت بصورها و أرقمها أدخل هنا https://www.sokhna.org/lifestyle

<<

  • التليفريك:  

و ده من أمتع الحاجات اللي ممكن تجربها بالنهار هناك لأن ناس كتير ميعرفوش إنه في مصر و بالذات في العين السخنة ، فبتكون تجربة جديدة وجميلة بالنسبالهم. التليفريك بيوديك لأعلى قمة الجبل وبتشوف مناظر البحر والجبال والطبيعة الخلابة والمساحات الخضراء، يعني مفيش أروع من كده  

سعر التذكرة ب 85 جنية ذهاب و عودة و للأطفال 45 جنية ، و لو طفلك أقل من سنتين بيدخل مجاناً ، أما بالنسبة لمكانه ومواعيده فبتكون من 1 – 6 بليل في بورتو السخنة.

عشان تعرف ارقام التليفونات و تشوف الصور اضغط هنا https://www.sokhna.org/lifestyle

 لو عايز تجرب أنشطة جديدة غير السباحة والصيد ، فالبحر هناك بيشجعك على أنشطة كتير ممكن تجربها زي الغوص، والسنوركلينج، والكايت سيرفينج  و ده هتلاقيه في قرية بيلاجيو، و لو عندك أطفال فهتلاقي هناك أكوا بارك فيها ألعاب مائية مميزة ومنها TEDA FUN VALLEY، و بكده هتقدر تستمتع و تطمن على أطفالك في نفس الوقت .

و لو أنت من محبي رياضة الجولف، فهتلاقي فنادق كتير فيها ملاعب في "جاز ليتل فينس"، و"ستيلا دي ماري".

>>

  • السينمات:

 لو عايز تخرج بليل ومش عايز تسهر في مكان بليل مثلاً ، ممكن تدخل سينما دنيا بورتو السخنة مع أصحابك ، هتلاقي هناك أخر عروض الأفلام وأحسنها سواء أفلام أجنبية أو عربية.

>>

ناس كتير بتخاف من فكرة السفر بسبب إنهم مش بيلاقوا ديماً المطاعم و الكافيهات اللي بيحبوها ، بس في العين مش هتقابلك المشكلة دي لأن أغلب المطاعم الموجودة في القاهرة هتلاقيها هناك زي "تشيليز"، و"كارينوز"، و" ستوديو مصر"، و "حلقة السمك "، و"كنتاكي".

 المطاعم والكافيهات هناك بتتميز بتنوع المطابخ فيها علشان تناسب كل الأذواق ، فهتلاقي هناك مطاعم للمأكولات البحرية زي " الجزيرة "، و" السمكة "، و"جمبرينا"، و"إستاكوزا"، ومطاعم إيطالية زي "بيتزا رويال"، و"مورانو"، و"لا لونا"، ومطاعم صينية زي "آسيا"، و"تيدا"، وكمان مطاعم أمريكية. وفي كمان مطاعم أورينتال لو بتحب الأكل البيتي زي "كفر عبده"، و"أندريا"، و"بيت الحمام". 


via GIPHY

  • أماكن الخروج والسهر:

ناس كتير فاهمين إن العين السخنة بتقتصر على الأنشطة البحرية بس لكن ميعرفوش إن الحياة الليلية هناك مميزة جداً و إن في أماكن كتير للخروج و السهر حلوة جداً زي "بلو نوتي ديسكو"، و"تيرازينا لوبي بار"، و"كليك بيتش كلوب"، فهتتبسط يعني هتتبسط.